ስዑዲ ዓረብ: ሚሳይላት ሑቲ ጠሊፈ ትብል

ካብ ጐረቤት ሃገር የመን እተተኮሱ ሰለስተ ሚሳይላትን ድሮናትን ከም ዝጠለፈት ስዑዲ ዓረብ ገሊጻ።

ሓንቲ ካብዘን ሚሳይላት ኣብ ምብራቓዊት ከተማ ደማም ተጠሊፋ ከም ዝዓነወት ዝገለጸ ጸብጻብ ሚኒስትሪ ምክልኻል ብሰንኩ ክልተ ቆልዑ ጒድኣት ከም ዝበጽሖምን ሓደ ህንጻ ምዕናዉን ኣመልኪቱ።

ዕላማ ናይዚ መጥቃዕቲ: ንመደብራት ነዳዲ ዘይቲ ስዑዲ ዓረብ ንምጥቃዕ ምዃኑ: ጒጅለ ሑቲ ሓቢሩ ኣሎ። ተመሳሳሊ ዕላማ ዘለዎ እተባህለሉ መጥቃዕቲ: ኣብ ከተማታት ጂዛንን ናጅራንን እውን ከም እተፈተነ እውን እቲ ጒጅለ ወሲኹ ገሊጹ።

ኣብ መደብራት ነዳዲ ዘይቲ ስዑዲ ዓረብ ጒድኣት ብዛዕባ ምብጽሑ ዛጊት ዝተባህለ ነገር የለን።

ኣብ 2019: ጒጅለ ሑቲ: ብመንግስቲን ትካል ኣራምኮን ኣብ ዝውነና ክልተ መደብራት ነዳዲ ዘይቲ: መጥቃዕቲ ምክያዶምን እዚ ድማ ንመፍረ ድፍድፍ ዘይቲ ብ 5.7 ሚልዮን በርሚል ንመዓልቲ ኣጒዲልዎ ምንባሩን ዝዝከር እዩ።

ኣብ 2015: ሑቲ: ንርእሰ ከተማ የመን ድሕሪ ምቊጽጻሮም: ስዑዲ ዓረብ: ነቲ ዓለምለኻዊ ኣፍልጦ ዝረኸበ መንግስቲ ብምድጋፍ ናብ ኲናት የመን ምጽንባራ ዝፍለጥ እዩ።