ናይጀርያ: ዕጡቓት ንምቅላስ ዘኽእላ ነፈርቲ ኲናት ገዚኣ

ናይጀርያ: ዘይሕጋውያን ዕጡቓት ጒጅለታት ንምቅላስ ብዝብል ዝገዝኣተን ቀዳሞት ሽዱሽተ ነፈርቲ ምቕባላ ቢቢሲ ኣብ ዘውጽኦ ጸብጻብ ሓቢሩ።

እዘን A-29 Super Tucano ዝዓይነተን ነፈርቲ: ናብ ከተማ ካኖ ኣብ ዝኣተዋሉ እዋን: ሚኒስተር ምክልኻል እታ ሃገር: በሽር ማጋሺን: ወተሃደራውያን ሓለፍቲን ከም እተረኽቡ ተፈሊጡ። እዘን ነፈርቲ ነቶም ኣብ ጭውያን ግብረሽበራዊ ስራሓትን ተዋፊሮም ዝርከቡ ጒጅለታት ኣብ ምስላይን ምጥቃዕን ክዋፈራ ከም ዝኽእላ ተገሊጹ’ሎ።

ናይጀርያ ካብ ኣመሪካ ደርዘን ዝኾና ነፈርቲ ክትገዝእ ጠለብ ኣቕሪባ ምጽንሓ ዝፍለጥ እዩ። እተን ዝተረፋ 6 ካልኦት ነፈርቲ ኲናት ክሳብ ዝመጽእ ጥቅምቲ ናብ ናይጀርያ ክኣትዋ እየን ዝብል ትጽቢት ኣሎ ተባሂሉ’ሎ።

ኣብ ናይጀርያ ን ቦኮ ሓራም ሓዊስካ ብርክት ዝበሉ ግብረሽበራውያን ጒጅለታት ከም ዝንቀሳቐሱ ዝፍለጥ እዩ።