ኣብ ወፍሪ ምረጹኒ ማሕበራዊ ሚድያ ነቲ ያታዊ ኣገባብ ይትክኦ ኣሎ ተባሂሉ።

ተወዳደርቲ ሰልፊታት ሽወደን፡ ምስ ምቕራብ ናይቲ ኣብ 11 መስከረም ዝካየድ ምርጫ ሽወደን ናይ ምረጹኒ ወፍረን ዘካይዳሉ ኣገባብ ኣቓልቦ ይስሕብ ምህላዉ፡ ሬድዮ ሽወደን ጸብጺባ። እዘን ሰልፊታት ብኸመይ እየን ፖሊሲታተን ምስ ህዝቢ ዘፋልጣ ዘለዋ ዝብል ሕቶ ንምፍታሽ፡ እታ ሬድዮ ኣብ ዩኒቨርሲቲ ሉንድ መምህር ስትራቴጅያዊ ርክባት ከምኡ’ውን ተመራማሪ ፖለቲካዊ ስነፍልጠት ምስ ዝኾነ ኒልስ ጉስታፍሰን ኣብ ዝገበረቶ ቃለ-መሕትት፡ ሰልፊታት ፖለቲካ ንማሕበራዊ መራኸቢ ብዙሃን ይጥቀማ ምህላወን ኣጣሊላ’ላ።

“ኣብ ዝሓለፋ ሒደት ዓመታት ናይ ምረጹኒ ፖስተራት ኣብ ንእሽቶ ስክሪን ከም ዝስኳዕ ኮይኑ ይቐርብ ኔሩ። ሕጂ ግና ማሕበራዊ ሚድያ ነዚ ዝጸንሐ ያታዊ ኣገባብ እናተክአ ይመጽእ እዩ ዘሎ” ኢሉ’ሎ–ጉስታቭ።