ሙቐት ዝዓብለሎ ክሊማ፡ ናብ ሽወደን ገጹ ይምርሽ ኣሎ ተባሂሉ

ኣብ መብዛሕታኡ ክፋላት ሽወደን፡ ድሕሪ ናይ ሳምንታት ዝናብን ዝሑል ኩነታት ኣየርን፡ ካብ ምጅማር ናይዚ ሰሙን ኣትሒዙ ሙቐት ዝዓብለሎ ኩነታት ኣየር ብዘገምታ ይምለስ ምህላዉን ክሳብ 30⁰c  ክበጽሕ ከም ዝኽእልን ተሓቢሩ።

ክኢላ ኩነታት ኣየር መርበብ ሓበሬታ SVT ዝኾነት ጆሰፊን በሪስቴድት፡ ኩነታት ኣየር ሽወደን ካብ ኣውሮጳ ብዝመጽእ ማዕበል ሙቐት ክጽሎ ምዃኑን ንብዝሕ ዝበለ መዓልታት ከም ዝቕጽል ድማ ገሊጻ።

ኣብ ዝመጽእ ረቡዕ፡ ሙቐት ብርኡይ መጠን ክውስኽ ምዃኑን ቀዳም ድማ ኣብ ዝለዓለ ጥርዙ ክበጽሕ ከምዝኽእል ብምሕባር፡ መጠን ሙቐት ካብ 25⁰c ክሳብ 30⁰c ክኸውን ከምዝኽእል ገምጊማ ኣላ። እዚ መጠን ሙቐት ንምሕንባስ ኣዝዩ ምቹእ ክኸውን እዩ ድማ ተባሂሉ።

ኣብ ዝሓለፋ ሒደት መዓልታት፡ ብዙሓት ሃገራት ኣውሮፓ ክሳብ 40⁰c ዝበጽሕ መጠን ሙቐት ምምዝጋበን ይዝከር።