Harmony Media መሓዛ ተዛረብቲ ቋንቋ ትግርኛ
ብዙሕ ኣገዳስነት ዘይብሉ መገሻታት ካብ ምክያድ ክንቁጠብ፡ ቤት ጽሕፈት ወጻኢ ጉዳያት ሽወደን ምኽሩ ኣመሓላሊፉ ምንባሩ ዝዝከር ኮይኑ፡ ሎሚ ድማ፡ ናብ ኣርሜንያ፡ ኣዘርቢጃን፡ ቦስንያ ሄርዞጎቪና፡ ብሩነይ፡ ጆርዳን፡ ካናዳ፡ ኮሶቮ፡ ሞልዶቫ፡ ሞንተነግሮ፡ ቀጠርን ሱዑዲ ዓረብን ዝካየድ ዝኾነ ዓይነት መገሻታት ዝተፈቕደ ምዃኑ እቲ ቤት ጽሕፈት ኣዊጁ ክብል ማዕከን ዜና ተተ ኣቃሊሑ።
ይኹን እምበር፡ ኩነታት ለበዳ ተቐያያሪ ምስ ምዃኑ፡ ነፍሲ ወከፍ ገያሻይ፡ ቅድሚ ጉዕዝኡ ኣብ ዘሎ ግዜ፡ ሓደሽቲ መምርሒታት ወጺኦም ከይኮኑ ክከታተልን መምርሒታት ኮሮና ናይቲ ዝኸደሉ ዘሎ ሃገር ክኽተልን ዝምለሰሉ ግዜ ኣቐዲሙ ክምድብ ከምዝግባእ፡ ሚኒስትሪ ወጻኢ ጉዳያት ሽወደን ኣዘኻኺሩ።