ብኣማኢት ዝቑጸሩ ስደተኛታት ድሒኖም

ናብ ሰንበት ኣብ ዘውግሕ ዝነበረ ለይቲ፡ 400 ዝኾኑ ስደተኛታት፡ ካብ ገማግም ሊብያ ተበጊሶም ንማእከላይ ባሕሪ ሰንጢቖም ናብ ኤውሮፓ ክሰግሩ ኣብ ዝፈተንሉ እዋን፡ እታ ልዕሊ ዓቐን ጺዒና ዝነበረት ጃልባ፡ ማይ ክኣትዋ ብምጅማሩ፡ ናይ ምጥሓል ሓደጋ ኣንጻላልዮ ኣብ ዝነበረትሉ እዋን፡ ብሓለዋ ገማግም ሊብያ ረዲአት ረኺቦም ከምዝደሓኑ ማዕከን ዜና ተተ ሓቢሩ።

ናይ መድሕን ስራሓት ንኸካይዳ ኣብቲ ከባቢ ዝነበራ ሲ-ዎች 3 ን ኦሻን ቫይኪንግ ዝተባህላ ጀላቡ፡ ኣብቲ ሽዱሽተ ሰዓታት ዝወሰደ፡ ስደተኛታት ናይ ምድሓን መስርሕ ከምዝተሳተፋ ናይ ዓይኒ መሰኻኽር ሓቢሮም።

ዝበዝሑ ካብቶም ስደተኛታት፡ ካብ ሞሮኮ፡ ባንግላዴሽ፡ ግብጽን ሶርያን ምዃኖም ተሓቢሩ።

ብመሰረት ጸብጻባት ዓለምለኻዊ ማሕበር ስደተኛታት፡ ኣብዚ ዓመት’ዚ ጥራይ፡ 1100 ሰባት፡ ኣብ ማእከላይ ባሕሪ ከምዝሞቱ ሓቢሩ።