ብውሑዱ 20 ስደተኛታት ኣብ ባሕሪ ድሕሪ ምድርባዮም ከምዝሞቱ ተፈሊጡ

ኣብ ከባቢ ወሽመጥ ዓደን፡ ኣስገርቲ፡ ካብቶም ዘስግርዎም ዝነበሩ ሰባት፡ 80 ዝኾኑ፡ ናብ ባሕሪ ድሕሪ ምድርባዮም፡ ብውሑዱ 20 ስደተኛታት ከምዝሞቱ ኣብ ውድብ ሕቡራት ሃገራት ዝርከብ IOM ዝተባህለ ኤጄንሲ ሓቢሩ።

እቶም ስደተኛታት ካብ ምብራቕ ኣፍሪቃዊት ሃገር ጅቡቲ፡ ትማሊ ረቡዕ ንግሆ፡ ተበጊሶም፡ ድሕሪ ናይ ሓደ ሰዓትን ፈረቓን ጉዕዞ፡ እታ ጃልባ ሰባት ስለዝበዛሓ፡ እቶም ኣስገርቲ፡ ንገለ ሰባት ናብቲ ባሕሪ ከምዝደርበይዎም ተፈሊጡ።

ብተመሳሳሊ መንገዲ፡ ኣብ ዝሓለፈ ወርሒ ጥቅምቲ 2020፡ ኣብ ከባቢ ወሽመጥ ዓደን፡ 50 ዝኾኑ ስደተኛታት፡ ብኣስገርቲ፡ ካብ ክልተ ጀላቡ፡ ናብ ባሕሪ ድሕሪ ምድርባዮም፡ ሂወቶም ከምዝሰኣኑ ይዝከር።