ኣመሪካን ጀርመንን ንተጻብኦ ሩስያ ብሓባር ክምክታ ተሰማሚዐን

ቻንስለር ጀርመን፡ ኣንገላ መርከል፡ ንዋሺንግተን ኣብ እትበጽሓሉ ዘላ እዋን፡ ፕረሲደንት ጆ ባይደን፡ ክልቲአን ሃገራት ንተጻብኦ ሩስያ ብሓባር ክምክታ እየን ምባሉ ተገሊጹ።

ኣንገላ መርከል ብወገና፡ ሩስያ፡ ነቲ ካብ ሞስኮ ናብ ጀርመን ዝዝርጋሕ ምንጪ ጸዓት ጋዝ፡ ከም መሳርሒ ኲናት ክትጥቀመሉ ክንፈቅድ የብልናን ክትብል ገሊጻ’ላ።

ብዘይካ’ዚ፡ ክልቲአን ሃገራት፡ ንዘይ ዲሞክራስያዊ ተግባራት ቻይና ከም ዝዂንና ገሊጸን ኣለዋ። “ብወገን ምብራቕ ዝርከብ መሻርኽትና ክንፊ ኔቶ ካብ ተጻብኦ ሩስያ ንምሕላው መኸተና ክንቅጽሎ ኢና” ክብል ጆ ባይደን ምስ መርከል ብምዃን ኣብ ዝሃብዎ ጋዜጣዊ ዋዕላ ኣረዲኦም።