ኣብ መንጎ ኢትዮጵያን ሱዳንን ዝነበረ ወተሃደራዊ ወጥሪ ተጋዲዱ

ኣብቲ ውግእን ግጭትን ዘይተፈልዮ ዞባ ቀርኒ ኣፍሪቃ፡ ኣብ መንጎ ኢትዮጵያን ሱዳንን ፈኸም እናበለ ክኸይድ ዝጸንሐ ዶባዊ ምስሕሓብ፡ ናብ ቅሉዕ ወትሃደራዊ ግጭት ከም ዝዓረገ ዝተፈላለያ ማዕከናት ዜና ዓለም፡ ንወግዓዊ መግለጺ መንግስቲ ሱዳን ብምጥቃስ ሓቢረን። እቶም ዝተረኽቡ ሓበሬታታት ከም ዘመልክትዎ መንግስቲ ኢትዮጵያ ኣብ ከባቢ ኣልፋሽቅ  ሱዳን ብነፈርቲ ኪናት መጥቃዕቲ ደብዳብ ከም ዝፈጸመን  በቲ ምጥቃዕቲ ህጻናት ዝርከብዎም ሰለማውያን ሰባት ከም ዝተጉድኡ መንግስቲ ሱዳን ከሲ ኣቅሪቡ ኣሎ። ጸብጻባት ከም ዘረጋገጽዎ ዞባ ቀርኒ ኣፍሪቃ ብዝተፈላለዩ ረብሓ ዘለዎም ናይ ደገ ሓይልታት ተሃንዲሱ ናብ ሓደገኛ ዞባዊ ዘይምርግጋእ ዘለዎ ከባቢ የመርሕዎ ከም ዘሎ ተንተንቲ ፖለቲካ ይገልጹ።