ኣብ ኲባ ዓብዪ ህዝባዊ ተቓውሞ ተላዒሉ

ኣብ ዝሓለፉ ዓሰርተታት ዓመታት ተራእዩ ዘይፈልጥ ንመንግስቲ ዝቃወም ህዝባዊ ሰልፊ ኣብ ርእሰ ከተማ ኲባ ሃቫናን ካልአይቲ ዝዓበየት ከተማ ሳንቲያጎን ይካየድ ምህላዉ ተገሊጹ። እቶም ሰልፈኛታት ለበዳ ዝተሓዘሉ ዘሎ ኣገባብ፥ ቀጻሊ ዝረአ ዘሎ ሕጽረት መግቢን ጸብጻባት ሚድያን ብምጥቃስ ፕረሲደንት ሚግዎአል ዲያዝ ካነል ካብ ስልጣኑ ክወርድ ሓቲቶም ኣለዉ።

“ኣብ ኣዝዩ ኣሸጋሪ ኲነታት ኢና ዘሎና፥ ለውጢ ስርዓት የድልየና እዩ” ክትብል ሓንቲ ካብዞም ሰልፈኛታት መምህር ትልሂት ሚራንዳ ላዛራ ምስ ሮይተርስ ኣብ ዝገበረቶ ቃለመሕትት ሓቢራ።

ፖሊስ ኣብ ጎደናታት ሃቫና ከም እተራእዩን ዛጊት 20 ዝኾኑ ካብዞም ሰልፈኛታት ኣብ ትሕቲ ቀይዲ ከም ዝወዓሉን ተገሊጹ’ሎ።

መራሒ ዴሳዊ ሰልፊን ፕረሲደንትን እታ ሃገር ሚግዌል ናብ ተሌቪዥን እታ ሃገር ቀሪቡ ነቲ ቊጥዐ ህዝቢ ከተሃዳድእ ከም ዝፈተነ ዝገለጸ እቲ ሓበሬታ ነዚ ናዕቢ ክለዓል ምኽንያት እትኸውን ዘላ ኣመሪካ እያ ክብል ምውቃሱ ኣመልኪቱ።

ፕረሲደንት ኩባ ዝመጽእ ሰኑይ ተወሳኺ መገልጺ ብተሌቪዥን እታ ሃገር ክህብ እዩ ተባሂሉ’ሎ።