ሃገራት ካብ ባህርያዊ ነዳዲ ክረሓቓ ይሰማምዓ

ሚኒስተር ኣከባቢ ሽወደን ሮሚና ፑርሞክታሪ ነቲ መንግስታት ዓለም ካብ ባህርያዊ ነዳዲ ክርሕቑ ዝጽውዕ ውዕል ክሊማ ዱባይ ብሓጎስ ከም እትቕበሎ ንዚ ኣገዳሲ ውሳነ ብዝቐልጠፈ ኣብ ትግባረ ምውዓል ነቲ ኣብ 2050 ፈነወ በካሊ ጋዝ ናብ ዜሮ ምውራድ ዝብል ሸቶ ኣብ ግብሪ ንምውዓል ኣዝዩ ሓጋዚ እዩ ተባሂሉ’ሎ። ብፍላይ ማ ኣፍረይቲ ነዳዲ ዝኾና ሃገራት ኣካል እዚ ውዕል ምዃነን ነቲ ውዕል ዝያዳ ሓይሊ ዝህቦ እዩ ክትብል ፑርሞኽታሪ ወሲኻ ገሊጻ’ላ። ይኹን’ምበር ከም ግሪንፒስ ዝኣመሰሉ ናይ ጎስጓስ ጉጅለታት እቲ ስምምዕ ክንድቲ ዝድለ ርሕቀት ከምዘይከይድ ስክፍታኦም ገሊጾም ኣለዉ። ሓደ ካብዚ ዕንቅፋታት ከኣ እቲ ውዕል ዋሕዲ ንጹርነት ዘለዎ ምዃኑ እዩ። እዚ ስጒምቲ ብኽንደየናይ ፍጥነት ክኸይድ ከም ዘለዎ ዝሕብር ናይ ግዜ ሰሌዳ የብሉን ክብል ክኢላ ኣከባቢ ደቪድ ሚሪኼረ ቅረታኡ ገሊጹ’ሎ። እዚ እናኾነ ኮሚተ ምምሕዳር ከተማ ዮተቦሪ፡ ኣብ ማእከል ከተማ ብኤሌክትሪክ ዝሰርሓ ተሽከርከርቲ ጥራይ ዝጥቀማሉ ዞባ ክህሉ፡ ካብ መጻረዪ ነዳዲ ዝወጽእ ፈነወ በካሊ ጋዝ ንምንካይ ጻዕርታት ክግበር፡ በዚ ድማ ኣሰር ካርቦን እታ ከተማ ብዛዕባ ዝንከየሉ ኣገባብ ኣመልኪቱ ይመክር ኣሎ። “ፈነወ ትኪ ናብቲ ዮተቦሪ ዘቐመጦ ሸቶታት ይወርድን የሎን” ትብል ኣብ ዩኒቨርሲቲ ቻልመርስ ፕሮፌሰር ኣባል ዘላቒ ምንቅስቓስ ዝኾነት ፍራንቸስ ስፕረይ። ንሳ፡ እቲ ወሳኒ ውጽኢት ናይቲ ኣብ ዱባይ ዝካየድ ዘሎ ዋዕላ COP28 ዝኾነ ባህርያዊ ነዳዲ ምውጋድ ዝብል ሓሳብ፡ ብደረጃ ውሽጢ ዓዲ’ውን ክትግበር ከምዘለዎ ኣተሓሳሲባ’ላ።