ሓደ ተማሃራይ ካብ ናሕሲ ቤት ትምህርቲ ጸዲፉ

ኣብ ፈለማ መዓልቲ ትምህርቲ፡ ሓደ ተማሃራይ ናይ ቤት ትምህርቲ ካልኣይ ደረጃ ኤስሉቭ፡ ካብ ልዕሊ ናሕሲ (ዚንጎ) ናይቲ ቤት ትምህርቲ ጸዲፉ ከም ዝሞተ ጋዜጣ ስኮንስካ ዶግብላደት ሓቢሩ።

እቲ ናሕሲ፡ ብተሸካል ሓጺን ዝተሓጽረ ምዃኑ እኳ እንተተፈልጠ፡ እቲ ተማሃራይ ብኸመይ ካብኡ ክጸድፍ ከምዝኸኣለ ኣይተፈልጠን። እቲ ተማሃራይ፡ ብዝወረዶ መጉዳእቲ ከምዝሞተ፡ ምምሕዳር ቤት ትምህርቲ፡ ንምሸቱ ኣቃሊሑ።

ብዙሓት ተማሃሮ ነቲ ፍጻሜ ክርእይዎ ከምዝኸኣሉ ጋዜጣ ሲድስቬኒስካን ጽሒፉ። ተማሃሮ፡ ንጽባሒቱ፡ ኣብ ኣፍደገ ናይቲ ቤት ትምህርቲ ሽምዓታት ከብርሁ ከምዝጀመሩ እቲ ጋዜጣ ብምቕጻል ሓቢሩ።   

እቲ ኣጋጣሚ ዘሕዝን እዩ። ፖሊስ ድማ መርመራታት የካይድ ስለዘሎ፡ ብወገን ምምሕዳር፡ ነት ኣጋጣሚ ብዝምልከት ዝኾነ ዓይነት ርእይቶ ክህብ ከምዘይክእል ኣብ ኤስሉቭ ዝርከብ ምምሕዳር ቆልዑን መንእሰያትን ሓቢሩ።