190 ሃገራትን ውድባትን: ከሰል ከይጥቀማ ይመባጸዓ

ኣብ ዓለምና ከሰል ብብዝሒ ካብ ዝጥቀማ ሃገራት ዝኾና ፖላንድ፥ ቬትናምን ቺለን ሓዊስካ 190 ሃገራትን ውድባትን ነዚ ኣገባብ ክሓድጋ ከም እተመባጸዓ ዋዕላ COP26 ዘአንግድ ዘሎ መንግስቲ ብሪጣንያ ኣፍሊጡ። እዘን ሃገራት ኣብ ከሰል ዝገብራኦ ሃገራዊን ኣህጒራዊን ወፍሪ ከቋርጻ ቃል ኣትየን ኣለዋ።

“ዓለምና ንጒዳይ ከሰል ዓጽያ ብጽሩይ ጸዓት ዝዝወር ቊጠባዊ ረብሓ ኣብ ምንዳይ ምትኳራ ናብ ቅኑዕ ኣንፈት ትኸይድ ምህላዋ ዘርኢ እዩ” ክብል ጸሓፊ ቊጠባን ጸዓትን ብሪጣንያ: ክዋሲ ክዋርቴንግ: ገሊጹ’ሎ።

እንተኾነ ግና ከምኒ ኣመሪካ፥ ህንዲ፥ ቻይናን ኣውስትራልያን ዝበላ ገዚፍ መጠን ከሰል ዝጥቀማ ሃገራት ነቲ ውዕል ከም ዘይከተማ ቢቢሲ ሓቢራ’ላ።

ክሰል ቀንዲ ጠንቂ ክሊማዊ ለውጢ ዓለምና ምዃኑ ጸብጻባት የመልክቱ።