ልእልቲ ኣንጎላ፡ ብርክታት ኩባንያ ነዳዲ፡ ከተረክብ ትግደድ

ጓል ፕረሲደንት ኣንጎላ ነበር፡ ኢዛቤል ዶስ ሳንቶስ፡ 422 ሚልዮን ዩሮ፡ ዝዋግኡ ብርኪ ሃገራዊ ኲባንያ ነዳዲ፡ ሳናንጎል፡ ከተረክብ ከም እተገደደት ተገሊጹ ክብል ማዕከን ዜና ተተ ሓቢሩ።

ነዚ ጒዳይ ክዳኒ ዝጸንሐ ሆላንዳዊ መጋባእያ፡ እዚ ብርኪ፡ ካብ ፖርቱጋላዊ ኲባንያ፡ ጋልፕ፡ ብዘይሕጋዊ ኣገባብ ዝተረኽበ እዩ ክብል ገሊጽዎ ኣሎ።

ሃብቲ ናይዛ ልእልቲ፡ ካብ ካዝና ህዝቢ ኣንጎላ፡ ዝተሰርቀ እዩ ክብል ኣማኻሪ ሕጊ ኩባንያ ሳናንጎል፡ ንሆላንዳዊት ጋዜጣ ኣብ ዝሃቦ ቃል ሓቢሩ።

ኢዛቤል ዶስ ሳንቶስ፡ ኣቦኣ ሆዜ ኤድዋርዶ ዶስ ሳንቶስ፡ ንኣንጎላ፡ ኣርብዓ ዓመት ኣብ ዝገዝኣሉ ዘመን ዘጥረየቶ ሃብቲ ምዃኑ ይፍለጥ። ኣብ ዓዳ “ልእልቲ” ብዝብል ቅጽል እትጽዋዕ ኤዛቤል፡ ኣብ ኣህጒር ኣፍሪቃ ቀዳመይቲ ቢልዮነር ጓል ኣንስተይቲ ምዃና ብፎርብስ ማጋዜን ተረቚሓ ምንባራ ይዝከር።

ኤዛቤል፡ እዚ ሕጋዊ መስርሕ ቅድሚ ምጅማሩ፡ ኣብ ኣውሮጳ ምቾት ዝመልኦ ህይወት ትመርሕ ምንባራ ጸብጻባት የመልክቱ። ካብ 2019 ንደሓር ግን፡ ኩሉ ንብረታን ገንዘባን ክድስከል ከም እትገብረ ዝገለጸ እቲ ሓበሬታ፡ ኤዛቤል፡ ነዞም ክስታት፡ ፖለቲካዊ ድርኺት ዘለዎ ተራ ክስታት እዩም ብምባል ገሊጻቶም።

ዝሓለፈ ዓመት፡ ሓዋ፡ ሆዜ ፊሎሜኖ፡ ሓላፊ ማዕከን ነዳዲ ኣብ ዝነበረሉ እዋን፡ ብዝፈጸሞ ገንዘባዊ ምትላል፡ ንሓሙሽተ ዓመት ማእሰርቲ ከም ዝተፈርደ ይዝከር።